Egnatia nuk shkoi më shumë se barazimi 0-0 në përballjen e parë ndaj Lillestrøm, të vlefshme për raundin e fundit kualifikues të Europa League. Rrogozhinasit patën disa mundësi të mira për të marrë avantazhin, por mungesa e finalizimit bëri që sfida të mbyllej pa gola.
Lillestrøm e nisi më agresivisht takimin dhe që në minutën e 5-të iu afrua golit. Gabrielsen shënoi me kokë pas një goditjeje standarde, por goli u anulua për pozicion jashtë loje.
Egnatia reagoi gradualisht dhe në minutën e 26-të pati një mundësi të mirë me Daniel Adjessan, i cili goditi me kokë, por u ndal nga portieri norvegjez. Pak para pushimit, Alessandro Albanese pati dy raste të njëpasnjëshme, në minutat 41’ dhe 42’, por asnjëra prej tyre nuk përfundoi në rrjetë.
Pjesa e dytë nisi sërish me Lillestrøm më kërkues. Në minutën e 51-të, Fredrik Gulbrandsen provoi nga distanca, por Dajsinani reagoi në kohë dhe shpëtoi portën e Egnatias.
Momenti më i mirë i ndeshjes për kampionët e Shqipërisë erdhi në minutën e 70-të. Gruda u shfaq rrezikshëm në zonë dhe goditi me kokë, por topi u përplas në traversë, duke i mohuar Egnatias avantazhin.
Gjithçka mbetet e hapur për duelin e kthimit, ku rrogozhinasit do të kërkojnë fitoren që do t’i afronte me fazën e Europa League.