Egnatia ka mbyllur me zhgënjim aventurën në Europa League, teksa kampionët e Shqipërisë u eliminuan nga Lillestrom pas një ndeshjeje dramatike të vendosur në minutat shtesë. Norvegjezët triumfuan 2-1, duke përmbysur avantazhin e rrogozhinasve.
Skuadra e Nevil Dedes zhvilloi një pjesë të parë mjaft të mirë dhe arriti të kalojë në avantazh në minutën e 33-të. Sota përfitoi nga një asist i Fernandos pas një goditjeje këndi dhe dërgoi topin në rrjetë, duke i dhënë Egnatias epërsinë.
Kampionët shqiptarë e administruan avantazhin dhe shkuan në dhomat e zhveshjes me rezultatin 0-1. Për një pjesë të mirë të takimit, Egnatia ishte pranë objektivit të madh, kualifikimit në fazën e ligës së Europa League.
Por Lillestrom nuk u dorëzua. Në minutën e 82-të, Moen Fos riktheu baraspeshën, pas asistit të Ibrahimajt, duke e çuar sfidën në shtesë. Në 30 minutat shtesë, të dyja skuadrat kërkuan golin e fitores. Egnatia pati rastet e saj, por mungesa e qetësisë në momentet vendimtare i kushtoi shtrenjtë.
Në minutën e 94-t, Olsen goditi rëndë shpresat e kampionëve shqiptarë, duke shënuar golin e dytë për Lillestrom dhe duke përmbysur gjithçka. Egnatia tentoi deri në fund të gjente golin e barazimit, por pa sukses. Kështu, aventura në Europa League mbyllet me eliminim.
Megjithatë, rrogozhinasit do të vijojnë rrugëtimin europian, pasi do të transferohen në Conference League, ku do të kenë një tjetër mundësi për të përfaqësuar Shqipërinë në arenën ndërkombëtare.