Egnatia-Midtjylland zhvendoset në “Elbasan Arena” për shkak të trazirave në Tiranë

Egnatia do ta nisë rrugëtimin historik në fazën e ligës së Conference League në stadiumin “Elbasan Arena”. Përballja ndaj danezëve të Midtjylland, e planifikuar fillimisht në “Air Albania”, do të zhvillohet në Elbasan, në orën 18:45.

Zhvendosja e ndeshjes është bërë për arsye sigurie, për shkak të situatës së krijuar nga protestat në kryeqytet gjatë ditëve të fundit. Kështu, kampionët e Shqipërisë do të zbresin në fushë në Elbasan për të përballuar një sfidë të rëndësishme në arenën evropiane, në një moment historik për klubin rrogozhinas.

Për Egnatian, pjesëmarrja në fazën e ligës së Conference League përbën një arritje të veçantë, pasi skuadra merr pjesë për herë të parë në historinë e saj në këtë fazë të një kompeticioni evropian.

Përballë Midtjylland, rrogozhinasit do të synojnë të nisin me rezultat pozitiv aventurën evropiane dhe të dëshmojnë se mund të konkurrojnë edhe ndaj kundërshtarëve me përvojë ndërkombëtare.

Tashmë, vëmendja është përqendruar te “Elbasan Arena”, ku Egnatia do të kërkojë të shfrytëzojë këtë mundësi historike për të bërë një tjetër hap të rëndësishëm në rrugëtimin e saj në futbollin evropian.