Ekskluzive/ Kombëtarja e Anglisë mbërrin në stadiumin ”Air Albania”

Festa kuqezi ka shpërthyer në Tiranë, por në rrugë janë parë edhe grupe me tifozë të ardhur nga Britania e Madhe. Sakaq gazetari i ”Koha Jonë”, Rozalb Lika sjell pamjet nga terreni ku ekipi i Anglisë ka mbërritur tashmë në stadiumin ”Air Albania”, aty ku ekipi kuqezi i pret për super sfidën.

Kombëtarja shqiptare e futbollit siguroi për herë të parë fazën play-off të një Kupe Bote. Kuqezinjtë fituan 0-1 në Andorra dhe do e mbyllin Grupin K në vendin e dytë, me Anglinë si kryesuese që e ka siguruar tashmë kreun dhe një biletë për në finalet e Kupës së Botës 2026.

Shqipëria dhe Anglia janë përballur shtatë herë më parë. Në të gjitha rastet ka fituar Anglia, ndërsa ne i kemi shënuar ‘Tre Luanëve’ vetëm një herë, në humbjen 1-3 në ”Qemal Stafa” më 28 mars 2001, me gol nga Altin Rraklli. Ndërkohë që Anglia na ka shënuar 21 gola.

Takimi i fundit mes skuadrave është më 21 mars 2025, kur në Londër, Anglia fitonte 2-0. Kjo është edhe ndeshja e fundit që Shqipëria ka humbur këtë vit, teksa më pas Kombëtarja ka gjashtë fitore (pesë radhazi) dhe dy barazime. Anglia, në shtatë ndeshjet e kësaj fushate kualifikuese ka shtatë fitore.