Elseid Hysaj pranë një aventure të re në Serie A, Lecce nis negociatat

Elseid Hysaj mund të vazhdojë karrierën në elitën e futbollit italian. Mbrojtësi i Kombëtares shqiptare është në bisedime me Leccen, pasi u largua si lojtar i lirë nga Lazio në përfundim të kontratës së tij, duke mbyllur një cikël pesëvjeçar në klubin kryeqytetas.

Sipas gazetarit të njohur italian Gianluca Di Marzio, kontaktet mes palëve kanë nisur dhe negociatat janë në zhvillim. Drejtuesit e Lecces po shqyrtojnë seriozisht mundësinë për të afruar në skuadër mbrojtësin 32-vjeçar, duke vlerësuar eksperiencën e tij të gjatë në Serie A.

Sezoni i fundit me Lazion nuk ishte më i miri për Hysajn, i cili u aktivizua në vetëm pesë ndeshje të kampionatit. Megjithatë, gjatë pesë viteve të kaluara në “Olimpico”, ai zhvilloi 131 ndeshje në të gjitha kompeticionet, duke shënuar dy gola dhe dhuruar katër asistime.

Nëse negociatat përfundojnë me sukses, Hysaj do të hapë një kapitull të ri në karrierën e tij, duke mbetur pjesë e Serie A. Pas eksperiencave me Empolin, Napolin dhe Lazion, Lecce pritet të bëhet klubi i katërt italian në karrierën e mbrojtësit shkodran.

Një transferim i tillë do të rriste edhe prezencën shqiptare te Lecce. Aktualisht pjesë e skuadrës është mesfushori Medon Berisha, ndërsa Ylber Ramadani u largua vetëm pak ditë më parë për të vazhduar karrierën në Superligën e Turqisë.