Emergjenca në mbrojtje, Milani kërkon Marash Kumbullën në merkaton e dimrit

Milani është në kërkim të një mbrojtësi këto orë të fundit të merkatos, teksa pista “Demiral” bëhet mjaft e vështirë për shkak se Al-Ahli nuk e lë të lirë.

Kuqezinjtë kanë në plane që të transferojnë mbrojtësin e Kombëtares shqiptare, Marash Kumbulla. Edhe me ardhjen e De Rosit, 23-vjeçari sërish nuk është në planet e Romës, me këtë të fundit që kërkon ta largojë menjëherë në mënyrë që të ketë vend për Anxhelinjon.

Paolo Paganini gjatë emisionit “90 Minuto”, shpjegoi se Milani është i gatshëm që të ulet në tavolinën e bisedimeve me Romën për Kumbullën, i cili shihet dhe si opsioni më i lehtë për t’u arritur këtë merkato.

Kuqezinjtë kanë probleme të shumta në prapavijë për shkak të dëmtimeve të disa lojtarëve në qendër të mbrojtjes, ndaj dhe afrimi i Kumbullës mund të jetë një zgjedhje ideale si për lojtarin ashtu dhe për Milanin.