Ndërsa futbolli europian është në një pauzë për shkak të ndeshjeve të kombëtareve, Milani ka nisur të mendojë për merkaton e ardhshme. Kuqezinjtë po monitorojnë prej kohësh situatën e Endrick dhe tashmë në skenë ka dalë një zhvillim i ri: sulmuesi brazilian do të ishte i gatshëm të largohej në huazim për të gjetur më shumë hapësira dhe për të rilindur karrierën e tij.
Endrick, i cili pëlqehet edhe nga Roma e Gasperinit dhe Aston Villa, aktualisht po përballet me një situatë të vështirë. 20-vjeçari ka pasur shumë pak minuta në dispozicion këtë sezon, duke regjistruar vetëm katër minuta aktivizim.
Sulmuesi brazilian mund të luajë në disa pozicione në repartin ofensiv dhe Milani e sheh si një profil interesant për të ardhmen. Klubi kuqezi do të ishte i gatshëm t’i garantonte minuta dhe një rol më të rëndësishëm në skuadër, me synimin për ta rikthyer lojtarin në formën që tregoi më parë.
Sipas raportimeve të Gazzetta dello Sport, vetë Endrick ka bërë të ditur se nuk dëshiron ta kalojë të gjithë sezonin në stol dhe ka nisur të shqyrtojë alternativat që i janë ofruar. Në këtë garë, Milani duket se është një nga destinacionet që e tërheq më shumë brazilianin.
Situata, megjithatë, nuk është ende e zgjidhur. Pengesa kryesore mund të jetë trajneri José Mourinho, i cili deri tani nuk e ka aktivizuar rregullisht Endrick, por gjithashtu nuk ka dhënë dritën jeshile për largimin e tij.
Në verë, Mourinho nuk ishte i gatshëm ta linte brazilianin të largohej. Tani mbetet për t’u parë nëse qëndrimi i tij do të ndryshojë dhe nëse do të lejojë një huazim në janar. Ndërkohë, Real Madridi nuk duket se do të kundërshtonte një lëvizje të tillë, nëse ajo do t’i shërbente zhvillimit të lojtarit.
Endrick vjen pas një eksperience pozitive te Lyon, ku sezonin e kaluar shënoi 8 gola dhe dha 8 asistime në 21 ndeshje. Milani shpreson që një rikthim në një rol protagonist të mund t’i japë brazilianit mundësinë për të treguar sërish potencialin e tij.