“Është e gjitha një katastrofë”, Taremi denoncon trajtimin që po i bëhet Iranit

Kombëtarja e Iran e nisi aventurën e saj në Kupën e Botës 2022 me një barazim 2-2 ndaj Zelandën e Re, në ndeshjen e parë të Grupit G, e zhvilluar në SoFi Stadium në Los Anxhelos.

Përfaqësuesja iraniane pati mbështetjen e mijëra tifozëve iraniano-amerikanë të pranishëm në stadium, ndërsa protagonisti kryesor ishte kapiteni i ekipit, Mehdi Taremi. Sulmuesi, i cili në të kaluarën ka luajtur për Inter Milan, ishte pranë golit pas një aksioni individual spektakolar, por goditja e tij përfundoi në shtyllë.

Megjithëse nuk arriti të shënonte, Taremi mori duartrokitje të shumta dhe pas përfundimit të takimit foli hapur për vështirësitë me të cilat po përballet delegacioni iranian gjatë Botërorit.

Një nga temat kryesore ishte vizita e presidentit të FIFA, Gianni Infantino, në dhomat e zhveshjes së ekipit iranian. Sipas pamjeve të publikuara në rrjetet sociale, Infantino i inkurajoi futbollistët duke u thënë se janë “më të fortë se çdo vështirësi” dhe se ky është vetëm fillimi i rrugëtimit të tyre në turne.

Raportimet e mediave britanike bëjnë të ditur se kreu i FIFA-s u ka premtuar lojtarëve se do të angazhohet për të lehtësuar ardhjen në Shtetet e Bashkuara të pjesëtarëve të delegacionit iranian, të cilët nuk kanë mundur të sigurojnë vizat për të qenë pranë ekipit në Botëror.

Taremi nuk e fshehu pakënaqësinë për situatën, duke theksuar se mungesa e drejtuesve dhe stafit po krijon probleme serioze në funksionimin normal të kombëtares.

“Ne nuk e kemi presidentin tonë këtu dhe as pjesën më të madhe të stafit, gjë që është shumë e rëndësishme për ekipin. Menaxheri ynë po kryen edhe detyra që normalisht i takojnë zyrës së shtypit. Për ne kjo situatë është një kaos i vërtetë”, deklaroi sulmuesi iranian.