Europa League/ Hidhet shorti, Egnatia zbulon kundërshtarin e mundshëm në “play-off”

Sporti E Hënë, 3 Gusht 2026 14:44

Shorti i hedhur mesditën e kësaj të hëne ka përcaktuar çiftet e fazës “play-off” të Europa League, ku në vazo ishte edhe kampionia e Shqipërisë, Egnatia.

Skuadra rrogozhinase është ende në garë në turin e tretë kualifikues, ku do të përballet me Shamrock Rovers. Nëse arrin të eliminojë irlandezët, Egnatia do të sfidojë norvegjezët e Lillestrøm në fazën “play-off”. Bëhet fjalë për një kundërshtar mjaft të fortë, që vjen si fitues në fuqi i Kupës së Norvegjisë.

Edhe në rast eliminimi nga Shamrock Rovers, aventura evropiane e Egnatias nuk do të përfundojë. Kampionët e Shqipërisë do të kalojnë në “play-off”-in e Conference League, ku do të kenë një tjetër mundësi për të siguruar pjesëmarrjen në fazën e ligës së një kompeticioni evropian.

Në shortin e sotëm morën pjesë 24 skuadra, ndërsa vetëm 12 prej tyre do të sigurojnë një vend në fazën e ligës së Europa League për sezonin 2026-2027. Takimet e para të “play-off”-it do të zhvillohen më 20 gusht, ndërsa ndeshjet e kthimit janë planifikuar për më 27 gusht.