Familja i kërkon Ronaldos të largohet në heshtje nga Portugalia

Cristiano Ronaldo po përballet me një situatë të re të vështirë në karrierën e tij, ndërsa mediat portugeze raportojnë se familjarët e tij i kanë këshilluar të mendojë për tërheqjen nga futbolli.

Ylli i Portugalisë dhe kapiteni i Al-Nassr ka pasur gjithmonë mbështetjen e fortë të familjes, duke gjetur tek ajo forcën për të përballuar kritikat dhe për të vazhduar të japë maksimumin në fushën e lojës. Megjithatë, së fundmi, emri i tij është përfshirë në një debat të ri që lidhet me trajnerin Jorge Jesus dhe një premtim të pretenduar për grumbullimin e tij me kombëtaren portugeze.

Gazetari portugez Luís Vilar ka bërë një deklaratë të bujshme në televizionin Al-Arabiya, duke zbuluar se familja e Ronaldos i ka sugjeruar një qasje më të kujdesshme.

“Familja e Ronaldos këtë herë i ka këshilluar të tërhiqet dhe ta përfundojë aventurën e tij në heshtje”, deklaroi Vilar.

Ai shtoi se Ronaldo e ka të vështirë të pranojë se koha e tij në futboll mund të jetë drejt fundit, pavarësisht vlerës së jashtëzakonshme që ka si simbol i Portugalisë.

Sipas gazetarit, një pjesë e opinionit publik mendon se egoja dhe ambiciet personale po ndikojnë në vendimet e yllit portugez, i cili vazhdon të luajë pavarësisht pikëpyetjeve mbi formën e tij fizike dhe teknike.