FIFA pritet të regjistrojë të ardhurat më të larta në historinë e Kupës së Botës, me fitimet totale nga edicioni 2026 që mund të arrijnë në rreth 15 miliardë dollarë (afërsisht 13 miliardë euro). Lajmi është publikuar nga e përditshmja britanike The Guardian, e cila thekson se shifra është dukshëm më e lartë se parashikimi fillestar prej 11 miliardë dollarësh.
Sipas raportimit, rritja e ndjeshme e të ardhurave është ndikuar kryesisht nga tregu sekondar i rishitjes së biletave dhe nga paketat premium të mikpritjes (hospitality), që përfshijnë lozhat, zonat VIP dhe shërbime të tjera ekskluzive.
Në rastin e rishitjes së biletave, FIFA përfiton dy komisione prej 15 për qind, një nga shitësi dhe një tjetër nga blerësi, çka ka sjellë një burim të rëndësishëm të ardhurash gjatë turneut.
The Guardian vlerëson se ky sukses financiar mund të ketë ndikim edhe në aspektin politik brenda organizatës. Rritja e fondeve që FIFA shpërndan për federatat kombëtare pritet të forcojë më tej mbështetjen për presidentin Gianni Infantino, veçanërisht nga federatat që përfitojnë drejtpërdrejt nga këto investime.
Sipas gazetës britanike, rreth 200 federata anëtare, pothuajse të gjitha, kanë shprehur tashmë gatishmërinë për të mbështetur Infantinon në zgjedhjet e ardhshme për president të FIFA-s.
Ndërkohë, suksesi organizativ dhe financiar i Botërorit 2026 po forcon edhe mundësinë që Shtetet e Bashkuara të rikthehen si organizatore të një tjetër Kampionati Botëror në të ardhmen. Edicionet e viteve 2030 dhe 2034 janë tashmë të caktuara për Marokun, Spanjën dhe Portugalinë, respektivisht Arabinë Saudite, ndërsa organizimi i Botërorit 2038 mbetet ende i hapur, me SHBA-në që konsiderohet një nga kandidatet potenciale.