FIFA publikon renditjen e qershorit, Shqipëria humbet një pozicion

Federata Ndërkombëtare e Futbollit (FIFA) ka publikuar renditjen më të re të kombëtareve pas zhvillimit të ndeshjeve miqësore të muajit qershor, me Shqipërinë që ka regjistruar një rënie të lehtë në klasifikim.

Kombëtarja kuqezi, e cila nisi epokën e trajnerit Rolando Maran me humbjen ndaj Izraelit, ka zbritur me një vend dhe tashmë renditet në pozitën e 65-të në botë me 1382.49 pikë.

Ndërkohë, Kosova ka ruajtur pozicionin e saj në renditjen e FIFA-s. Dardanët vazhdojnë të mbajnë vendin e 78-të me 1317.17 pikë, pavarësisht disfatës së pësuar në miqësoren ndaj Çekisë më 31 maj.

Megjithatë, renditja mund të pësojë ndryshime të tjera në ditët në vijim, pasi të dyja përfaqësueset kanë ende për të zhvilluar ndeshjet e radhës miqësore. Shqipëria do të përballet me Luksemburgun më 6 qershor, ndërsa Kosova do të luajë ndaj Andorrës një ditë më vonë.

Sa i përket kreut të renditjes botërore, Argjentina është rikthyer në vendin e parë, duke fituar tre pozicione. Kampionët e botës përfituan nga humbja e Francës në miqësoren kundër Bregut të Fildishtë, rezultat që bëri që skuadra e Didier Deschamps të rrëshqasë në vendin e tretë.

Mes Argjentinës dhe Francës pozicionohet Spanja, e cila mban vendin e dytë pas barazimit 1-1 në ndeshjen miqësore ndaj Irakut.

Përditësimi i fundit i FIFA-s konfirmon se ndeshjet miqësore vazhdojnë të kenë ndikim të drejtpërdrejtë në renditjen botërore, veçanërisht në prag të Kupës së Botës 2026, ku kombëtaret po testojnë formën dhe përgatitjet e tyre për turneun më të rëndësishëm të futbollit.