Kupa e Botës 2026 po i afrohet aktit të fundit, me finalen e madhe që pritet të jetë një spektakël jo vetëm për shkak të përballjes sportive, por edhe për programin madhështor të përgatitur jashtë fushës.
Finalja do të zhvillohet në “New York New Jersey Stadium” dhe, përveç yjeve të futbollit, tifozët do të kenë mundësi të shijojnë performanca nga disa prej emrave më të mëdhenj të muzikës dhe spektaklit botëror.
Ceremonia e mbylljes do të nisë në orën 19:30, ndërsa dyert e stadiumit do të hapen katër orë përpara fillimit të ndeshjes. Organizatorët u kanë bërë thirrje tifozëve të mbërrijnë më herët, pasi edhe ata do të jenë pjesë aktive e atmosferës së krijuar përpara finales.
Një nga momentet më të veçanta do të jetë prania e artistes italiane Laura Pausini, e cila do të ngjitet në skenë së bashku me Nicole Scherzinger dhe Robbie Williams. Tre artistët do të interpretojnë këngën zyrtare të turneut, “Desire”, ndërsa në spektakël pritet të jetë i pranishëm edhe aktori i famshëm Tom Cruise.
“Jam krenare që një zë italian është pjesë e kësaj feste globale. Nuk pres dot ta ndaj këtë moment me tifozët e futbollit në të gjithë botën”, ka shkruar Pausini në rrjetet sociale.
Ndërkohë, këngëtarja Jennifer Hudson do të interpretojë himnin kombëtar të Shteteve të Bashkuara para fillimit të finales. Fituesja e çmimeve Emmy, Grammy, Oscar dhe Tony do të sjellë një version special të “The Star-Spangled Banner”.
Pjesë e spektaklit do të jetë edhe fenomeni i rrjeteve sociale, IShowSpeed, një nga krijuesit më të ndjekur në botë, i njohur për pasionin e tij të madh për futbollin dhe veçanërisht për Cristiano Ronaldon.
Edhe pushimi i pjesës së parë pritet të jetë ndryshe nga zakonisht. Sipas raportimeve, “half-time show” mund të zgjasë deri në 20-25 minuta, duke i dhënë finales një format të ngjashëm me spektaklin e Super Bowl. Në skenë pritet të shfaqen emra të mëdhenj si Madonna, Shakira dhe Justin Bieber.
Ceremonia është realizuar në bashkëpunim me “Balich Wonder Studio” dhe është konceptuar për të festuar pasionin, emocionin dhe frymën globale që ka shoqëruar edicionin e 23-të të Kupës së Botës.