Flamurtari dhe Skënderbeu, blerje që “peshojnë”

Ekipet e Kategorisë Superiore vazhdojnë përgatitjet e dimrit si dhe merkaton ofensive. Kukësi zhvilloi në Ulqin një miqësore me ekipin vendas Otranto e Ulqinit dhe e fitoi 5:0 me gola të  William, dopietë e Refice dhe të Emini e Nikas. Vllaznia barazoi 1-1 me Besëlidhjen në Ulqin, ku lojtari në provë Miran Maksuti shënoi për të besuarit e Armando Cungut, ndërsa shkodrani Arenc Dibra barazoi për Besëlidhjen. Partizani pas miqësores së fituar 1-0 me Teutën, me gol të Mazrekaj, do të luajë sot një miqësore tjetër ndaj Apolonisë. Nga merkato, janë Flamurtari dhe Skënderbeu që kanë prezantuar dy blerje të rëndësishme gjatë ditës së djeshme:

Skënderbeu

Menaxheri i përgjithshëm i Skënderbeut, Gerhard Takaj dhe drejtori sportiv Haris Fakic prezantuan dje rikthimin e Sebino Plakut. Ish-sulmuesi i Partizanit, gjatë pjesës së parë të këtij sezoni, i bashkohet  kampionëve në fuqi, me parametra zero. Ai para se të rikthehej te të kuqtë dhe pasi u largua nga Skënderbeu, kaloi një eksperiencë në Poloni. Skënderbeu shiti dy lojtarë para merkatos së dimrit. Peter Olayinka kaloi te Gent i Belgjikës për 1.1 mln euro dhe Bernard Berisha  u transferua te Anzhi i Rusisë, për 600 mijë euro. Me këto dy operacioni, arka e Skënderbeut mbetet e shëndoshë dhe afrimi i fundit i sulmuesit Plaku një arsye më shumë që tifozët korçarë të besojnë te titulli i radhës kampion.

Flamurtari

Pas një pjese të parë të vështirë dhe pasi ka kaluar krizën, Flamurtari është hedhur fuqishëm në merkato. Ignacio Nicolini është zyrtarisht futbollisti më i ri i Flamurtarit. Mesfushori uruguaian zbarkoi paraditen e djeshme në aeroportin e Rinasit dhe udhëtoi më pas drejt Vlorës për të firmosur kontratën që do ta lidhë me Flamurtarin për pjesën e dytë të këtij sezoni. Pasi hodhi firmën mbi kontratë Nicolini u prezantua si blerja më e re e Flamurtarit, ku i pranishëm ishte edhe administratori i klubit kuqezi Sinan Idrizi, 27-vjeçari është gati për debutimin me Flamurtarin. Ai gjatë karrierës ka luajtur në disa prej klubeve elitare të futbollit uruguaian. Skuadra e tij e fundit ishte Racing Club i Montevideos. Nicolini është përforcimi i 7-të i skuadrës vlonjate në muajin Janar. Brazilianët Danilo Alvesh, Lucas Caniggia dhe Joao Henrique si dhe kosovarët Ilir Berisha, Dardan Çerkini e Besnik Krasniqi ishin blerjet e para.