Trajneri i Barcelonës, Hansi Flick, ka pranuar epërsinë e Paris Saint-Germain pas humbjes 4-2 në ndeshjen e vlefshme për fazën e ligës në Champions League. Tekniku gjerman e konsideron këtë disfatë një mundësi për të nxjerrë mësime dhe për të korrigjuar gabimet përpara përballjes së madhe me Real Madridin.
Barcelona nuk arriti të përballonte ritmin dhe cilësinë e kampionëve francezë, të cilët triumfuan me rezultatin 4-2. Pas ndeshjes, Flick nuk kërkoi justifikime, por pranoi se kundërshtari ishte më i mirë, duke theksuar se skuadra e tij duhet të analizojë gabimet dhe të reagojë në sfidat e ardhshme.
“Ishte një ndeshje e madhe nga të dyja skuadrat, por Paris Saint-Germain tregoi se ishte më i mirë se ne. Humbëm, por mësuam. Gabimet ndodhin dhe ajo që kemi treguar gjatë javëve të fundit ka qenë shumë e mirë. Ndeshja e sotme nuk ishte e lehtë, pasi lojtarët vrapuan shumë dhe u përpoqën të luanin futbollin e tyre”, u shpreh trajneri gjerman.
Flick pranoi gjithashtu se skuadra nuk ishte përgatitur në mënyrën më të mirë fizike pas ndeshjes së mëparshme, por theksoi se kjo nuk mund të përdoret si justifikim.
“Rikuperimi pas ndeshjes së kaluar nuk ishte më i miri, por kjo nuk është një justifikim. Duhet të mësojmë nga ajo që ndodhi. Jemi në tetor dhe titujt nuk vendosen në këtë muaj. Champions League vendoset në qershor”, deklaroi ai, duke nënvizuar se rrugëtimi i Barcelonës në Evropë është ende i gjatë.
Një nga aspektet që shqetësoi trajnerin katalanas ishte rënia e skuadrës në minutat e fundit, kur PSG shfrytëzoi cilësinë dhe shpejtësinë në tranzicionet sulmuese.
“Paris Saint-Germain ka cilësi të jashtëzakonshme në tranzicionet sulmuese. Ne u përpoqëm të mbroheshim, por në 15 minutat e fundit nuk ishim në nivelin tonë më të mirë fizik. Kjo nuk është një justifikim. Duhet të rishikojmë atë që ndodhi pas ndeshjes së kaluar, të analizojmë situatën dhe të përgatitemi më mirë për të ardhmen”, tha Flick.
Barcelona ka përpara një provë të rëndësishme kundër Real Madridit, ku do të kërkojë të tregojë se është në gjendje të reagojë pas disfatës evropiane.