Foda reagon pas çështjes Rrahmani: Ka shumë dramë, po ekzagjerohet …

Trajneri i Kosovës, Franco Foda, ka konfirmuar se kapiteni Amir Rrahmani e ka njoftuar personalisht për vendimin e tij për t’u tërhequr nga përfaqësuesja, në një periudhë kur në futbollin kosovar po diskutohet gjerësisht për raportet mes lojtarëve dhe drejtuesve të Federatës.

Foda foli për këtë çështje në një intervistë për Canal+, gjatë ndeshjes së Europa League mes Sturm Graz dhe Rennes, duke pranuar se situata rreth kombëtares është e ngarkuar emocionalisht.

“Gjithçka është shumë emocionale në Kosovë. Fakti është se Amir Rrahmani deklaroi tërheqjen nga kombëtarja. Ai më informoi personalisht për këtë”, deklaroi Foda.

Foda tha se diskutimet për një bojkot të mundshëm nga futbollistë të tjerë janë të ekzagjeruara dhe nuk përputhen me informacionet që ai ka.

“Ka shumë dramë që po ekzagjerohet. Zërat se edhe më shumë lojtarë duan të bojkotojnë ekipin kombëtar nuk janë të vërteta”, u shpreh trajneri i Dardanëve.

Ndërkohë, Foda bëri të ditur se pret që pjesa tjetër e futbollistëve të jenë në dispozicion të tij të hënën, kur Kosova do të nisë përgatitjet për sfidat e ardhshme.

Dardanët kanë përpara një seri ndeshjesh në Nations League, ku do të përballen me Irlandën, Austrinë në dy raste dhe Izraelin.