Eliminimi nga Champions League ka lënë një shije të hidhur te Lyon, ndërsa trajneri Paulo Fonseca është vënë nën presion pas humbjes 2-1 ndaj Fenerbahçes në ndeshjen e kthimit të play-off-it.
Skuadra franceze i dha lamtumirën kompeticionit më prestigjioz europian, ndërsa një nga pikat më të diskutuara pas takimit ishte menaxhimi i zëvendësimeve nga Fonseca. Disa vëzhgues e kritikuan teknikun portugez se ndërhyri shumë vonë për të ndryshuar rrjedhën e ndeshjes.
Në konferencën për shtyp, një pyetje pikërisht për këtë temë duket se e humbi durimin e trajnerit të Lyonit.
“Është gjithmonë e njëjta pyetje. Tashmë jam mësuar me të. Në fund të ndeshjes është e lehtë të flasësh për zëvendësimet. Gjithmonë e njëjta gjë”, deklaroi Fonseca.
Më pas, me një dozë të dukshme ironie, ai shtoi: “Ndoshta kjo është arsyeja pse jam një trajner m***. Ky është shpjegimi”
Pas eliminimit, Fonseca duhet të rikthejë sa më shpejt qetësinë në skuadër dhe të fokusohet te kampionati dhe Europa League. Por trajneri pranoi gjithashtu se dështimi për të siguruar Champions League mund të ndikojë edhe në merkaton e klubit.
“Jam trajneri, por e kuptoj situatën. Champions League ishte shumë e rëndësishme që të mund të vazhdonim me të njëjtët lojtarë. Ndoshta tani do të na duhet të shesim. Ky është realiteti”, u shpreh ai.
Moskalifikimi në fazën e ligës së Champions League përbën një goditje të rëndësishme edhe në aspektin financiar. Lyon pritej të përfitonte të paktën 23 milionë euro vetëm nga pjesëmarrja, ndërsa të ardhurat totale nga shpërblimet, të drejtat televizive dhe aktivitetet komerciale mund të arrinin rreth 40 milionë euro.
“Champions League ishte një objektiv i rëndësishëm sepse donim të luanim në këtë kompeticion. Tani duhet të përqendrohemi te kampionati dhe Europa League, e cila do të vijë shumë shpejt”, deklaroi ai.