Kupa e Botës po hyn në fazën vendimtare të grupeve, ku ndeshjet e treta do të përcaktojnë ekipet që do të vijojnë rrugëtimin drejt fazave me eliminim direkt, emisioni “Koha e Botërorit” në moderimin e Rozalb Lika, vjen me një episod të ri të mbushur me analiza, debate dhe këndvështrime interesante nga emra të njohur të futbollit shqiptar.
I ftuar ishte rekordmeni i futbollit shqiptar, Ledio Pano, si dhe gazetari sportiv i RTSH, Isa Halili. Një nga temat kryesore të diskutimit ishte krahasimi mes Lionel Messi dhe Cristiano Ronaldo, një debat që vazhdon të dominojë mediat sportive dhe opinionin e tifozëve në mbarë botën.
Vëmendje të veçantë morën edhe paraqitjet e Argjentinës dhe Francës, dy prej skuadrave që kanë bindur me performancat e tyre në ndeshjet e para të turneut. Analistët i konsideruan të dyja ekipet si kandidatë seriozë për të shkuar deri në fund të kompeticionit.
Në të njëjtën kohë, u diskutua edhe për situatën e Gjermanisë dhe Brazilit. Pavarësisht historisë së pasur dhe traditës fituese, të dyja kombëtaret nuk po shihen me të njëjtat pritshmëri si në edicionet e kaluara, kryesisht për shkak të mungesës së yjeve që kanë karakterizuar brezat e artë të këtyre vendeve.
Një tjetër pikë e rëndësishme e analizës ishte ecuria e skuadrave në dy ndeshjet e para të fazës së grupeve, ku surpriza më e madhe mbetet eliminimi i Turqisë.
`