Futbollistit turk i vidhet ora me vlerë 200 mijë euro në Sevilla gjatë sfidës me Spanjën

Pas barazimit të arritur në transfertë ndaj Spanjës në kualifikueset e Botërorit 2026, Kombëtarja e Turqisë e drejtuar nga Vincenzo Montella është përballur me një episod të papritur dhe aspak të këndshëm. Ndërkohë që skuadra festonte një rezultat pozitiv dhe mbyllte grupin në vendin e dytë, pas Spanjës, duke siguruar pjesëmarrjen në “play off”, në dhomat e zhveshjes ka ndodhur një vjedhje e bujshme.

Sipas mediave kryesore spanjolle, nga dhoma e zhveshjes së ekipit turk në stadiumin “La Cartuja” të Seviljes janë zhdukur disa sende me vlerë të lartë. Personeli i skuadrës dha alarmin pasi u rikthye në ambientet e brendshme për të përfunduar procedurat pas ndeshjes dhe konstatoi mungesën e një ore luksoze dhe dy unazave, të cilat i përkisnin anëtarëve të delegacionit turk.

Gazeta spanjolle Marca raportoi se ora kishte një vlerë të vlerësuar rreth 200 mijë euro, ndërsa secila prej dy unazave kapte shifrën mbi 60 mijë euro. Ajo që fillimisht u mendua si një keqvendosje e objekteve personale, shumë shpejt u kthye në një kallëzim zyrtar pasi u konstatua se sendet kishin humbur përfundimisht.

Autoritetet spanjolle u përfshinë menjëherë dhe nisën hetimet. Sipas burimeve të Marca, policia ka arritur të rikuperojë të gjitha sendet e humbura dhe ka identifikuar një person të dyshuar si autor të vjedhjes, ndërsa nuk përjashtohet mundësia që të kenë qenë të përfshirë edhe persona të tjerë. Hetimet vazhdojnë për të zbardhur plotësisht ngjarjen dhe për të kuptuar se si dikush ka mundur të hyjë në një zonë teorikisht të mbrojtur.

Ky incident ka prishur pjesërisht atmosferën pozitive të Kombëtares turke, e cila në fushë kishte marrë një rezultat të rëndësishëm. Në Sevilje, festa u kthye në një episod të pakëndshëm, që pritet të diskutohet gjatë në ditët në vijim.