Eliminimi i Gjermanisë nga Paraguai në fazën e 1/16-ave të finales së Kupës së Botës 2026 vazhdon të shkaktojë polemika, me kritikat që janë përqendruar te një vendim arbitrar i diskutueshëm që, sipas shumë analistëve, ndikoi drejtpërdrejt në fatin e ndeshjes.
Kombëtarja gjermane ishte pranë kualifikimit, por një gol i anuluar në momentet vendimtare të takimit ka ndezur debatet në botën e futbollit. Sipas kritikëve, vendimi i arbitrave ndryshoi rrjedhën e sfidës, e cila më pas shkoi në penallti, ku Paraguai siguroi kualifikimin.
Ish-trajneri i Liverpool, Jurgen Klopp, ishte ndër zërat më kritikë ndaj anulimit të golit.
“Nëse ai gol konsiderohet i parregullt, atëherë Arsenali nuk do të shpallej kurrë kampion në Angli. Ata kanë shënuar një pjesë të madhe të golave të tyre pikërisht në atë mënyrë,” deklaroi Klopp për mediat gjermane.
Sipas tij, vendimi ishte i gabuar dhe i privoi gjermanët nga një fitore që do t’u siguronte kalimin në fazën tjetër të turneut.
Në të njëjtën linjë u shpreh edhe legjenda e futbollit anglez, Alan Shearer, i cili kritikoi ashpër mënyrën se si u interpretua kontakti në zonë.
“Portieri u rrëzua pas një kontakti minimal. Ishte një ndërhyrje shumë e lehtë. Për mua ishte një vendim i tmerrshëm. Futbolli është një sport kontakti dhe mendoj se portieri arriti të mashtrojë si arbitrin ashtu edhe VAR-in,” deklaroi Shearer.
Sipas ish-sulmuesit anglez, reagimi i portierit ndikoi në gjykimin e episodit, ndërsa anulimi i golit mbetet një nga momentet më të diskutueshme të këtij Botërori.