Roma e Gian Piero Gasperinit shikon pothuajse të gjithë nga lart, nga vendi i parë në klasifikim që e ndan me Interin. Verdhekuqtë do të kërkojnë të konsolidojnë këtë pozicion të dielën në ndeshjen kundër Cremoneses.
“Të gjithë djemtë janë në gjendjen më të mirë mendore dhe motivuese. Nuk do të flisja për ‘arritje të jashtëzakonshme’ pas 11 ndeshjesh, por sigurisht që rruga e ndjekur është shumë e mirë,” deklaroi trajneri.
Sipas tij, skuadra është rritur teknikisht dhe po shpreh potencial të lartë. “Përndryshe nuk do të ishim në atë pozicion në klasifikim. Megjithatë, gjithmonë mund të përmirësohemi. Mundësitë janë të pafundme dhe ne kemi tashmë një lojë kolektive më të mirë se disa javë më parë. Për këtë punojmë.”
Duke folur për të dëmtuarit, Gasperini sqaroi: “Angelino ka rifilluar punën individuale. Dybala dhe Bailey po punojnë së bashku dhe janë goxha përpara, por na duhet miratimi i mjekëve.” Ai shtoi se lojtarët e kombëtareve u kthyen herët dhe skuadra është gati të rifillojë aty ku e la.