Zvicra dhe Kanadaja janë dy kombëtaret e Grupit A që kanë siguruar zyrtarisht kualifikimin për në raundin e ardhshëm të Botërorit, pas ndeshjeve të fundit të fazës së grupeve.
Në takimin e zhvilluar në Vancouver, Zvicra triumfoi 2-1 ndaj Kanadasë, duke mbyllur grupin në vendin e parë me 7 pikë. Pjesa e parë u mbyll pa gola, por helvetët e nisën vrullshëm fraksionin e dytë të lojës.
Vetëm një minutë pas rifillimit, në të 46-ën, Ruben Vargas zhbllokoi rezultatin pas një kundërsulmi të shpejtë dhe asistit të Johan Manzambit. Në minutën e 57-të, zviceranët goditën sërish me një aksion të ngjashëm, këtë herë me Manzambin që realizoi për 2-0 pas pasimit të Breel Embolos.
Kanadaja reagoi në minutën e 76-të, kur i sapofuturi në fushë Promise David ngushtoi diferencën pas një asistimi të shkëlqyer nga Nathan Saliba. Megjithatë, rezultati mbeti i pandryshuar deri në fund. Kanadaja e mbyll grupin në vendin e dytë me 4 pikë.
Në ndeshjen tjetër të grupit, të luajtur në Seattle, Bosnje-Hercegovina mposhti Katarin me rezultatin 3-1 dhe ruajti shpresat për kualifikim si një nga kombëtaret më të mira të vendeve të treta.
Boshnjakët kaluan në avantazh në minutën e 29-të falë një supergoli të Kerim Alajbegovic. Mesfushori 18-vjeçar i Salzburgut realizoi nga distanca me një goditje spektakolare, që konsiderohet si një nga golat më të bukur të turneut deri tani.
Pesë minuta më vonë, Bosnja dyfishoi shifrat pas autogolit të Sultan Al Brake, i cili devijoi në rrjetën e tij tentativën e Edin Dzekos. Katari reagoi në minutën e 42-të me Hasan Al Haydos, duke ngushtuar rezultatin në 2-1 para pushimit.
Në pjesën e dytë, Bosnje-Hercegovina vulosi fitoren në minutën e 80-të me golin e Ermin Mamic. Me këtë sukses, boshnjakët e mbyllin grupin me 4 pikë, po aq sa Kanadaja, por mbeten pas për shkak të golavarazhit.