Guardiola shpërthen ndaj arbitrave dhe VAR: Nuk i kam besuar kurrë në Angli!

Trajneri i Manchester City, Pep Guardiola, ka bërë deklarata të forta ndaj arbitrave dhe sistemit VAR në Premier League, duke pranuar se gjatë gjithë periudhës së tij në futbollin anglez nuk ka pasur kurrë besim te vendimet e arbitrimit. Tekniku katalanas foli para sfidës së rëndësishme ndaj Crystal Palace, teksa gara për titull mbetet ende e hapur me Arsenalin në krye.

Guardiola kujtoi edhe dy finalet e fundit të humbura në Kupën FA, duke sugjeruar se arbitrat dhe VAR nuk kanë bërë detyrën siç duhet.

“I humbëm ato finale sepse arbitrat nuk bënë punën që duhet të bënin, madje as VAR-i. Për këtë arsye duhet të bëjmë më mirë vetë. Nuk kam besuar kurrë te arbitrat apo VAR që kur erdha në Angli”, deklaroi Guardiola.

Ai iu referua veçanërisht finales së sezonit të kaluar ndaj Crystal Palace, ku portieri Dean Henderson nuk u ndëshkua me karton të kuq, pavarësisht se preku topin me dorë jashtë zonës.

Guardiola përmendi edhe finalen e një viti më parë kundër Manchester United, ku sipas tij skuadra nuk mori dy penallti të pastra ndaj Erling Haaland.

“VAR është si hedhja e një monedhe. Duhet të jemi më të mirë vetë dhe të mos kërkojmë justifikime. Kur erdha këtu pas eksperiencave te Barcelona dhe Bayern Munich, i thosha vetes vetëm një gjë: bëje më mirë”, shtoi ai.

Ndërkohë, trajneri i City-t komentoi edhe situatën në garën për titull, pas fitores 1-0 të Arsenalit ndaj West Ham United, ndeshje ku një gol i vonë i West Ham u anulua pas ndërhyrjes së VAR-it.

Aktualisht, Arsenali kryeson kampionatin me pesë pikë më shumë se Manchester City, por skuadra e Guardiolës ka një ndeshje më pak.

“Sigurisht që gjithçka nuk është në dorën tonë. Gjëja më e rëndësishme tani është ndeshja me Crystal Palace. Pastaj do të shohim çfarë do të ndodhë. Kam mësuar se sapo humbet fokusin, futesh menjëherë në telashe”, përfundoi Guardiola.