Harry Kane ndryshon mendje për golfin, por ka një tjetër ëndërr pas futbollit

Harry Kane nuk e sheh më veten duke u marrë profesionalisht me golf pas përfundimit të karrierës në futboll, por sulmuesi anglez ka ende një tjetër dë

Kapiteni i Anglisë, i cili vijon të jetë në formë të shkëlqyer me Bayern Munich, ka rrëfyer se ideja për t’u bërë profesionist në golf e ka tërhequr dikur, por tashmë ka ndryshuar mendim.

Në një intervistë të dhënë në grumbullimin e Anglisë, Kane u pyet për një video të publikuar në rrjetet sociale, ku shihej duke goditur topa golfi nga një jaht luksoz gjatë pushimeve në Karaibe pas Botërorit.

Sulmuesi 33-vjeçar, i cili më herët kishte thënë se për një karrierë profesionale në golf “nuk duhet thënë kurrë kurrë”, tashmë duket më skeptik.

“E mendoj herë pas here. Shikoj golfin dhe them me vete: ‘Mund të isha atje’. Pastaj dal dhe luaj dhe them: ‘Jo, nuk ka asnjë shans’, u shpreh me humor Kane.

Megjithatë, golfi nuk është e vetmja alternativë që sulmuesi anglez ka menduar për jetën pas futbollit. Kane ka treguar më herët interes edhe për NFL-në dhe rolin e kicker-it, ndërsa një tjetër objektiv i mundshëm në të ardhmen mbetet aktivizimi në MLS.

Për momentin, megjithatë, Kane është i fokusuar plotësisht te futbolli. Ai po zhvillon një sezon tjetër të rëndësishëm me Bayern Munich dhe është pranë rinovimit të kontratës me klubin gjerman.

Me kombëtaren angleze, Kane vijon gjithashtu të shkruajë histori. Nëse do të aktivizohet në katër ndeshjet e ardhshme të Anglisë, ai do të barazojë rekordin e Peter Shilton për paraqitjet me “Tre Luanët”, me 125 ndeshje.