Një tifoz i Bodø/Glimt ka përfunduar në spital pas shembjes së pjesshme të sektorit të rezervuar për tifozët miq në stadiumin e Tromsø-s, gjatë ndeshjes mes dy skuadrave.
Sipas njoftimit zyrtar, nga incidenti janë prekur gjithsej katër persona, ndërsa njëri prej tyre është transportuar në spital për të marrë ndihmën e nevojshme mjekësore.
Familjarët e tifozit të lënduar kanë bërë të ditur për transmetuesin publik norvegjez NRK se ai ka pësuar fraktura në disa brinjë.
Ngjarja ndodhi pak para përfundimit të pjesës së parë të takimit, duke shkaktuar shqetësim të madh mes tifozëve dhe të pranishmëve në stadium.
Autoritetet kanë konfirmuar incidentin, ndërsa rrethanat që çuan në shembjen e pjesshme të tribunës mbeten për t’u sqaruar.
