Historia e Përparim Hetemajt: Nga lufta e Kosovëss, te goli ndaj Juves

Nga një i arratisur te goli i tij i parë me fanellën e Chievos ndaj një skuadre të madhe si Juventusi. Është kjo historia e Përparim Hetemajt futbollistit me origjinë shqiptare që dhimbjen e ka kthyer në forcë, për të arritur aty ku është sot.

Ai gol i tij ndaj bardhezinjëve mund të vlente vendin e parë në kampionat për Chievon së bashku me Interin, por Dybala me finalizimin nga pika e bardhë ia prishi disi festën 28-vjeçarit që luan për përfaqësuesen e Finlandës. Jeta ka patur shumë pengesa për numrin 56-të të veronezëve të cilin Hetemaj e mban që prej 2011-s dhe ja dedikon vitit të lindjes së babait të tij i cili prej disa kohësh është ndarë nga jeta. Djaloshi nga Skënderaj ka patur shumë ëndrra në jetë, disa prej tyre ka arritur ti realizojë edhe pse i është dashur të kalojë një fëmijëri të vështirë.

“Ëndrra më e madhe ka qenë të bëhesha një futbollist profesionist, e dëshiroja një gjë të tillë që fëmijë dhe jam i lumtur që ja kam dalë. Unë dhe vëllai im Mehmeti shikonim gjatë gjithë kohës futboll në televizor madje edhe luanim shumë në fusha të vogla me miqtë”.

Jeta e Përparim Hetemajt nuk ka qenë aspak e lehtë. Në moshën 6-vjeçare atij i është dashur të arratiset nga Kosova për shkak të luftës së bashku me të vëllain, dy motrat dhe prindërit.

“Fëmijëria ime ka qenë shumë e vështirë, babai fillimisht u operua në Kroaci, ndërsa më pas shkuam në Finlandë. I shpëtuam luftës por problemet nuk morën fund për ne. Babai ishte i sëmurë në atë kohë dhe nuk punonte dot më. Për një vit shkuam në Olou në një qendër që u vinte në ndihmë emigrantëve. Më pas u zhvendosëm në Helsinki ku spitalet ishin më të mira për të kuruar sëmundjen e babait i cili u nda nga jeta në 2010-n kur ishte vetëm 54 vjeç”.

Në pamundësi për të luajtur me Kosovën, Hetemaj zgjodhi të përfaqësonte Finlandën. I pyetur nëse ndihet më shumë kosovar apo finlandez 28-vjeçari u përgjigj në këtë mënyrë.

“Ndihem edhe kosovar edhe finlandez. Zgjodha përfaqësuesen finlandeze, sepse Kosova nuk e kishte një të tillë, ndërkohë që nuk kam patur pasaportë shqiptare dhe e kisha të pamundur të luaja për Shqipërinë”.

Të Dielën, Chievo e tij do të sfidojë Interin në një takim që mund të vlejë shumë për ecurinë e të dyja skuadrave në Serinë A. Hetemaj shpreson te marrja e një rezultati pozitiv përballë zikaltërve.

“Interi është një skuadër e madhe që po tregon një formë të mirë gjatë kësaj periudhe. Ata kanë në përbërje shumë lojtarë cilësorë, njëri prej tyre është Kondogbia të cilin e kam ndjekur edhe në Champions League. Gjithsesi ne do të përpiqemi të shfrytëzojmë momentin e mirë që po kalojmë”.