Holanda ka mbyllur në krye Grupin F të Botërorit 2026, pasi triumfoi me rezultatin 3-1 ndaj Tunizisë në ndeshjen e fundit të fazës së grupeve. Skuadra e drejtuar nga Ronald Koeman grumbulloi 7 pikë dhe siguroi kalimin në fazën e 1/16-ave, ku do të përballet me Marokun.
“Portokallinjtë” e nisën sfidën me ritëm të lartë, duke kaluar në avantazh që në minutën e 3-të falë një autogoli të Skhirit. Vetëm katër minuta më vonë, Brobbey dyfishoi shifrat dhe i dha qetësi holandezëve.
Në pjesën e dytë, Tunizia u përpoq të rikthehej në lojë dhe ngushtoi diferencën me golin e Mastourit në minutën e 54-t. Megjithatë, reagimi i Holandës ishte i menjëhershëm dhe Van Hecke vulosi fitoren 3-1 në minutën e 62-të.
Në ndeshjen tjetër të grupit, Japonia dhe Suedia ndanë pikët pas barazimit 1-1 në Arlington. Të dy golat u shënuan në pjesën e dytë. Fillimisht ishte Maeda që kaloi japonezët në avantazh në minutën e 56-të, ndërsa Elanga riktheu baraspeshën vetëm gjashtë minuta më vonë.
Ky rezultat i mjaftoi Japonisë për të siguruar vendin e dytë në grup dhe një biletë për në fazën e eliminimit direkt, ku do të ketë përballë Brazilin. Ndërkohë, Suedia avancon më tej si një nga skuadrat më të mira të renditura në vendin e tretë, duke siguruar gjithashtu kualifikimin në 1/16-at e finales.
Me përfundimin e ndeshjeve të Grupit F, Holanda e mbyll fazën e grupeve në vendin e parë me 7 pikë, Japonia renditet e dyta, ndërsa Suedia vazhdon aventurën botërore nga pozicioni i tretë.