Humb babain para El Clasicos ndaj Realit, Flick nuk mungon sonte në pankinë

Pak orë përpara supersfidës mes Barcelonës dhe Real Madrid, trajneri i katalanasve, Hansi Flick, ka marrë një lajm të rëndë familjar. Mediat pranë klubit raportojnë se babai i teknikut gjerman është ndarë nga jeta, duke sjellë një atmosferë zie në prag të “El Clásico”-s.

Nëpërmjet një reagimi zyrtar, Barcelona i ka shprehur ngushëllimet trajnerit dhe familjes së tij.

“Barcelona dhe e gjithë familja Blaugrana dëshirojnë të shprehin ngushëllimet më të sinqerta për Hansi Flick pas ndarjes nga jeta të babait të tij. Mendimet tona janë me të dhe familjen e tij në këtë moment të vështirë”, thuhet në mesazhin e klubit katalanas.

Pavarësisht dhimbjes së madhe personale, raportimet e fundit bëjnë me dije se Flick pritet të jetë në pankinë për sfidën ndaj Real Madridit, në një nga ndeshjet më të rëndësishme të sezonit për Barcelonën.