I ka kushtuar Juves 1 mln euro për ndeshje, bardhezinjtë “çlirohen” nga Arthur

Arthur Melo nuk është më lojtar i Juventusit. Klubi bardhezi ka zyrtarizuar ndërprerjen me marrëveshje të kontratës me mesfushorin brazilian, pas kërkesës së vetë futbollistit.

Arthur iu bashkua Juventusit në verën e vitit 2020 nga Barcelona, në kuadër të shkëmbimit që përfshiu edhe Miralem Pjanić. Megjithatë, eksperienca e tij në Torino nuk shkoi sipas pritshmërive.

Në gjashtë vite si lojtar i Juventusit, braziliani regjistroi vetëm 63 paraqitje, ndërsa pjesën më të madhe të kohës e kaloi në huazime te Liverpool, Fiorentina, Girona dhe së fundmi te Gremio.

Në sezonin e fundit, Arthur u aktivizua 23 herë me skuadrën braziliane, duke shënuar një gol dhe dhënë dy asistime.

Largimi i tij i jep fund edhe një situate të komplikuar financiare për Juventusin. Sipas të dhënave të raportuara, amortizimi i akumuluar në bilancin e klubit për kartonin e brazilianit ka arritur në rreth 65 milionë euro.

Për të shpërndarë në kohë koston e mbetur të amortizimit dhe për të shmangur një humbje të madhe financiare, Juventus kishte zgjatur më herët kontratën e Arthurit, e cila fillimisht skadonte në vitin 2027.

Edhe paga e mesfushorit përbënte një barrë të konsiderueshme. Në tre sezonet e para në Torino, Arthur kishte një pagë bruto prej rreth 12 milionë eurosh në vit. Më pas, për të lehtësuar huazimet e tij, u bënë disa ristrukturime të pagës.

Në total, pagat bruto që kanë mbetur realisht në ngarkim të Juventusit gjatë periudhës 2020-2026 vlerësohen rreth 32-35 milionë euro.

Duke marrë parasysh vetëm 63 ndeshjet e luajtura me fanellën bardhezi, investimi për Arthurin rezulton në një kosto prej më shumë se 1.5 milionë eurosh për ndeshje.