Pas transferimit të Ardon Jasharit, Milani është shumë pranë goditjes së dytë nga Zvicra. Sipas raportimeve të SportMediaset, kuqezinjtë janë gati të mbyllin marrëveshjen për Zachary Athekame, mbrojtësin e djathtë të Young Boys, i lindur në vitin 2004.
Oferta fillestare e Milanit prej 7 milionë euro ishte refuzuar nga klubi zviceran, por pas rritjes së shifrës nga ana e kuqezinjve, tashmë palët janë shumë pranë akordit për një shumë që mund të arrijë rreth 9 milionë euro në total. Klubi zviceran mund të japë ok-in përfundimtar që sot, ndërsa lojtari është në pritje për t’u nisur drejt Milanos.
Nëse gjithçka shkon sipas planit, Athekame mund të mbërrijë në Milano mbrëmjen e sotme, ndërsa vizitat mjekësore dhe firma në kontratë do të kryhen të nesërmen.
20-vjeçari, i cili vjen pas një sezoni të shkëlqyer dhe me 8 paraqitje në Champions League, pritet të zëvendësojë vendin e lënë bosh nga Emerson Royal dhe të konkurrojë me Alex Jimenez për një vend në të djathtën e mbrojtjes. Megjithatë, nuk përjashtohet as ideja e Max Allegri-t për të vazhduar eksperimentin me Fikayo Tomori në atë pozicion, ashtu siç ka ndodhur disa herë gjatë fazës përgatitore.
