Infantino: Jemi me UEFA-n, klubet rebele do të vuajnë pasojat!

President i FIFA-s, Ganni Infantino në një intervistë të gjatë për prestigjiozen spanjolle AS, e bëri të qartë pozicionin e institucionit që ai drejton në lidhje me zhvillimet e fundit të Superligës së Europës. Ai theksoi se  përgjegjësia e tij është të mbrojë të gjithë futbollin kudo.

“Ne mbështesim UEFA-n në qëndrimin kategorik dhe refuzues ndaj Superligës. Jemi kundër dhe do të kundërshtojmë gjithmonë çdo garë që nuk është pjesë e strukturës ndërkombëtare të futbollit dhe që kërcënon unitetin dhe solidaritetin, i cili duhet të ekzistojë gjithmonë në piramidën e futbollit, e cila lidh futbollin bazë dhe atë amator me protagonistët e këtij sporti. Duke thënë këtë, është gjithashtu detyrimi im të ndërmjetësoj midis palëve në mënyrë që të fillojë një dialog i thellë dhe konstruktiv në kërkim të zgjidhjeve pozitive. Ne duhet t’i trajtojmë së bashku problemet e futbollit”.

Infantino më pas u përqendrua në sanksionet e mundshme për klubet që filluan projektin.

“Ekzistojnë mekanizma kontrolli që garantojnë solidaritet në mënyrë që ekipet më pak të privilegjuara të mund të përfitojnë, qoftë edhe pjesërisht, nga suksesi dhe popullariteti. Sa u përket sanksioneve, ka organe kompetente dhe të pavarura që do të analizojnë se çfarë mund dhe duhet të bëhet në lidhje me këto klube, kështu që nuk është detyra ime të flas për to. Sigurisht, kjo nuk do të thotë që përjashtohen sanksionet në nivel kombëtar, kontinental ose global. E thashë një herë dhe po e përsëris, tani, qartë: klubet ose të jenë pjesë e strukturave të futbollit ose të duhet të përballen me pasojat.”