Infantino nuk tërhiqet nga projekti i ri, mund të përfitojë 60 milionë euro në vit

Presidenti i FIFA-s, Gianni Infantino, nuk ka ndërmend të tërhiqet nga projekti për reformimin e strukturës tregtare të futbollit botëror, pavarësisht kundërshtimeve të forta nga UEFA, CONCACAF dhe Konfederata Aziatike e Futbollit (AFC).

Sipas raportimit të The Times, Infantino parashikon të marrë drejtimin e FIFA Football Enterprise (FFE), kompanisë së re që do të menaxhojë aktivitetet tregtare dhe organizative të FIFA-s.

Nëse projekti miratohet, roli i Infantinos do të zgjerohej ndjeshëm, duke kaluar përtej detyrës së tij aktuale si president i FIFA-s. Madje, sipas të njëjtit burim, ai mund të përfitojë një pagë vjetore prej rreth 60 milionë dollarësh.

Një shpërblim i tillë do ta vendoste atë në të njëjtin nivel me Roger Goodell, drejtuesin e Ligës Kombëtare të Futbollit Amerikan (NFL), dhe mbi pothuajse të gjithë futbollistët profesionistë në botë. Sipas raportimeve, vetëm Cristiano Ronaldo, me pagën e tij te Al Nassr FC, do të fitonte më shumë.

Infantino po mendon edhe për ndryshime të tjera madhore në futbollin botëror. Pas vlerësimeve pozitive për Kupën e Botës me 48 skuadra, të zhvilluar në Shtetet e Bashkuara, Meksikë dhe Kanada, ai synon ta zgjerojë turneun në 64 ekipe pjesëmarrëse.

Një tjetër ide ambicioze është zhvillimi i Kupës së Botës çdo dy vjet, në vend të ciklit tradicional katërvjeçar, një propozim që pritet të shkaktojë debate të forta në komunitetin ndërkombëtar të futbollit.

Raporti i ngushtë i Infantinos me Shtetet e Bashkuara vazhdon të jetë në qendër të vëmendjes. Sipas mediave britanike, fondi amerikan Thrive Capital, i themeluar nga Joshua Kushner, vëllai i Jared Kushner, dhëndrit të presidentit amerikan Donald Trump, pritet të udhëheqë grupin e investitorëve që do të financojnë FIFA Football Enterprise.