Presidenti i FIFA, Gianni Infantino, ka bërë një koment me nota humori për kombëtaren e Italisë gjatë një interviste për CazeTV, teksa foli për mundësinë e zgjerimit të mëtejshëm të Kupës së Botës.
Duke komentuar formatin e ri të Botërorit 2026, ku për herë të parë marrin pjesë 48 kombëtare, Infantino tha se FIFA po vlerëson ndikimin e këtij modeli përpara se të marrë vendime për të ardhmen.
“Do të shohim si do të shkojë ky Botëror me 48 kombëtare. Është e qartë se bëhet fjalë për një ngjarje shumë të madhe. Kemi diskutuar edhe mundësinë e zgjerimit në 64 skuadra për të përfshirë edhe më shumë vende nga e gjithë bota. Propozimi është paraqitur në Këshillin e FIFA-s, por fillimisht le të shijojmë këtë Botëror të parë me 48 ekipe”, deklaroi ai.
Më pas kreu i FIFA-s ironizoi mungesën e Italisë në disa prej edicioneve të fundit të Kupës së Botës.
“Ndoshta me 64 ekipe Italia do të arrinte të kualifikohej. Madje mund t’i çonim në 208 skuadra dhe të shihnim nëse do të kualifikohej”, tha Infantino me shaka.
Komenti i Infantinos ka shkaktuar reagime në mediat sportive italiane, të cilat e kanë interpretuar deklaratën si një batutë ndaj një prej kombëtareve më të suksesshme në historinë e futbollit botëror.