Interi blindon Pio Espositon, rinovon kontratën deri në vitin 2031

Interi ka siguruar të ardhmen e Pio Espositos. Sulmuesi italian ka shpërthyer përfundimisht gjatë 12 muajve të fundit, duke treguar talentin e tij me fanellën zikaltër, por edhe me kombëtaren italiane.

Klubi milanez ka arritur marrëveshjen për rinovimin e kontratës së Espositos deri në vitin 2031. Sipas raportimeve, sulmuesi do të përfitojë një pagë prej më shumë se 3 milionë eurosh në sezon.

Kontrata aktuale e futbollistit të lindur në vitin 2005 skadonte në vitin 2030, por Interi ka vendosur të ndërhyjë menjëherë për të blinduar një prej talenteve më premtues të skuadrës.

Marrëveshja tashmë është arritur dhe zyrtarizimi i rinovimit pritet të bëhet shumë shpejt. Esposito ka bërë një progres të jashtëzakonshëm gjatë vitit të fundit, duke kaluar nga një talent premtues në një futbollist që tashmë konsiderohet pjesë e rëndësishme e së ardhmes së Interit.

Drejtuesit zikaltër kanë vendosur t’i japin një tjetër sinjal besimi sulmuesit të ri, duke e lidhur me klubin deri në verën e vitit 2031.