Interi nxjerr në shitje Asllanin dhe Pavardin, priten oferta nga Arabia Saudite

Interi po vazhdon të planifikojë lëvizjet në merkaton e verës dhe, përpara se të afrojë përforcime të reja, synon të sigurojë të ardhura nga shitja e disa futbollistëve që nuk bëjnë pjesë në planet e trajnerit Cristian Chivu.

Mes emrave që pritet të largohen janë edhe mesfushori shqiptar Kristjan Asllani dhe mbrojtësi francez Benjamin Pavard. Të dy janë rikthyer te zikaltërit pas përfundimit të huazimeve përkatëse, por nuk konsiderohen pjesë e projektit për sezonin e ri.

Sipas mediave italiane, agjenti Federico Pastorello zhvilloi një takim në selinë e Interit, ku mori autorizimin për të gjetur klube të interesuara për dy futbollistët. Vendimi vjen pasi Marseille dhe Beşiktaş zgjodhën të mos aktivizonin klauzolën e blerjes për ta.

Interi i vlerëson Asllanin dhe Pavardin me një çmim që varion nga 12 deri në 15 milionë euro secili, ndërsa drejtuesit shpresojnë të arkëtojnë një shumë të konsiderueshme nga largimi i tyre.

Raportimet bëjnë të ditur se pista më konkrete për të dy futbollistët mund të jetë jashtë Evropës, me klubet e Arabisë Saudite që po ndjekin nga afër situatën dhe mund të paraqesin oferta në javët e ardhshme.

Shitja e tyre do t’i krijonte Interit hapësirë si në buxhet, ashtu edhe në organikë, për të avancuar me objektivat e merkatos së verës.