Interi pa Thuram ndaj Cremoneses, Chivu gati të besojë te Esposito

Interi do të zbresë në fushë ndaj Cremoneses pa një nga lojtarët më vendimtarë të këtij fillim sezoni. Marcus Thuram, autor i 5 golave dhe 2 asistimeve në vetëm 7 ndeshje mes kampionatit dhe Champions League, do të mungojë për shkak të një problemi muskulor.

Klubi zikaltër ka vendosur të mos rrezikojë, duke ndjekur parimin e “zero rreziqeve”. Rikthimi i tij kundër Romës duket i pamundur. Në mungesë të francezit, trajneri Cristian Chivu është gati t’i besojë Pio Espositos ose Bonnyt, dy sulmues që kanë bindur më shumë se paraardhësit Correa e Arnautovic.

Në krahun tjetër, Lautaro Martinez është në super formë pas paraqitjes së shkëlqyer kundër Slavia Pragës dhe do të udhëheqë repartin ofensiv. Ndërkohë, në mesfushë pritet rikthimi i Nicolo Barellas, me Mkhitaryan që mund të marrë vendin e Sucic. Dimarco mund të marrë pushim, ndërsa Sommer mbetet i padiskutueshëm në portë.