Ipswich ngjitet në elitën e futbollit anglez, Anis Mehmeti do të luajë në Premier League

Ipswich Town siguron rikthimin në elitën e futbollit anglez. Skuadra blu vulosi ngjitjen në Premier League pas fitores bindëse 3-0 në shtëpi ndaj Queens Park Rangers, në javën e fundit të EFL Championship.

Ky sukses historik vjen pas një sezoni të gjatë dhe konkurrues, ku Ipswich siguroi vendin mes më të mirëve, duke u bërë skuadra e dytë që ngjitet në Premier League për edicionin e ri.

Në këtë arritje ka dhënë kontribut edhe Anis Mehmeti. Sulmuesi i krahut i kombëtares shqiptare u aktivizua për rreth 20 minuta në këtë takim vendimtar, duke regjistruar paraqitjen e tij të 18-të me Ipswich që prej transferimit në janar.

Mehmeti e nisi sezonin me Bristol City, ku në 28 ndeshje në Championship realizoi 8 gola. Transferimi te Ipswich për rreth 3 milionë euro rezultoi një hap i rëndësishëm në karrierën e tij, pasi ai do të jetë pjesë e Premier League sezonin e ardhshëm.

Në total, futbollisti shqiptar numëron 46 ndeshje në këtë sezon të Championship, ndërsa me Ipswich ka arritur të shënojë dy gola.