Eliminimi i hershëm i Koresë së Jugut nga Kupa e Botës 2026 ka shkaktuar pasoja të rënda edhe jashtë fushës së lojës. Ish-trajneri Hong Myung-bo është detyruar të largohet nga vendi, pasi u bë objekt i një fushate të ashpër urrejtjeje dhe kërcënimesh pas dështimit të kombëtares.
Sipas mediave italiane, 57-vjeçari është larguar drejt Shteteve të Bashkuara të Amerikës, në përpjekje për t’u shmangur presioneve dhe kërcënimeve që po përjetonte në Korenë e Jugut. Raportohet se ai ishte në shënjestër të sulmeve të vazhdueshme në rrjetet sociale, ishte refuzuar në hyrje të disa lokaleve dhe kishte marrë edhe kërcënime serioze me vdekje.
Edhe pse nuk është bërë e ditur nëse zhvendosja në SHBA do të jetë përfundimtare, largimi i tij pasqyron klimën e tensionuar që është krijuar në vend pas eliminimit të Koresë së Jugut që në fazën e grupeve të Botërorit.
Situata ka marrë edhe përmasa politike. Presidenti i Koresë së Jugut, Lee Jae-myung, e cilësoi dështimin e kombëtares si “plotësisht të pashpjegueshëm” dhe njoftoi nisjen e një hetimi për të zbardhur shkaqet e eliminimit.
Pa e përmendur drejtpërdrejt Hong Myung-bo, kreu i shtetit kritikoi mënyrën se si ishte bërë emërimi i trajnerit, duke lënë të kuptohet se vendimet e Federatës së Futbollit të Koresë së Jugut nuk ishin bazuar vetëm në meritë dhe kompetencë.
Presidenti paralajmëroi gjithashtu një reformë të administrimit të sportit në vend, duke theksuar se një dështim i përmasave të tilla është i papranueshëm dhe nuk duhet të përsëritet në të ardhmen.