Jadon Sancho rikthehet zyrtarisht te Dortmundi, merr numrin 10

Jadon Sancho bëhet sërish pjesë e Borussia Dortmund. Nënkampionët e Gjermanisë kanë prezantuar sulmuesin e majtë anglez, i cili vjen në një huazim 6-mujor nga Manchester United.

Edhe pse u transferua nga Dortmundi te United për 85 mln euro në verën e vitit 2021, asnjëherë nuk mundi të tregonte vlerat e tij më të mira.

Drejtuesit e klubit gjerman do të paguajnë 4 mln euro për huazimin e 23-vjeçarit, të cilin e pret fanella me numrin 10. Sancho kaloi katër sezone (2017-2021) shumë të mira në Bundesligë.

“Jadon është një futbollist që bën diferencën dhe mezi po pres ta shoh sërish me fanellën verdhezi. Ai i njeh qytetin, stadiumin, tifozët tanë dhe klubin tonë.

Edhe pse nuk ka luajtur ndeshje gjatë muajve të fundit, ne jemi të sigurt se do të gjejë formën e tij më të mirë dhe do të na ndihmojë në realizimin e objektivave me cilësitë e tij”, u shpreh Sebastian Kehl, drejtori sportiv i Dortmundit.