Juve +7 nga Roma, mediat angleze: Fergi pse e largove Pogba! (Foto)

Sporti E Hënë, 19 Prill 2021 01:48

Paul Pogba dhe Lichsteiner shënuan dy golat e fitores së Juves, në përballjen e javës së 20-të në Seria A, ndaj Kievos, duke i dhënë jo vetëm fitoren bardhezinjve, por edhe garancinë për të mbrojtur titullin e radhës kampion. Roma e vendit të dytë u ndal në barazim 1-1, në Firence. Me një lojtar si Pogba, që po shkëlqen çdo javë, Juve e ka më të lehtë, ndërkohë që mediat angleze gjejnë rast të kritikojnë Aleks Ferguson, ish-trajnerin e Djajve të Kuq, që e largoi francezin pak sezone më parë, për një shumë qesharake. Tashmë Junajtid po e kërkon, por nuk e blen dot as 50 mln euro, sepse Çelsi dhe Real Madrid janë gati të paguajnë edhe mbi 70 mln euro. Këto shifra marramendëse jepen në merkaton, ndërkohë që Juve marshon e qetë drejt titullin kampion në Seria A. – “Jemi një grup fantastik.” Janë këto fjalët e Angelo Ogbonna. Dhe fotografia që ai poston, i entuziazmon të gjithë tifozët bardhezi, sepse është në krah të lojtarëve Chiellini e Pogba. Juventus arriti të fitojë ndeshjen e fundit në Seria A, ndaj Kievos dhe thelloi diferencën me vendin e dytë, që mbahet nga Roma. Edhe trajneri Massimiliano Allegri ndan të njëjtin mendim: – “Një grup i bashkuar, që duhet të jetë i tillë për një garë të gjatë, siç është kampionati italian.” Grupi bardhezi, i formuar nga trajneri Antonio Conte, ndihmohet nga veteranët bardhezi. Allegri ka meritë sepse ka ditur të përshtatë të rinjtë për të ngritur edhe më tej nivelin e kësaj skuadre. Roma barazoi 1-1 me Fiorentinën në Firencë, duke lënë dy pikë në garë për titull. Gomes shënoi për vendasin në pjesën e parë dhe Ljajiç barazoi shifrat në pjesën e dytë. Ky barazim i kushtoi Romës shumë, pasi e sheh veten plot 7 pikë pas kryesuesve të Juves.

Serie A – Java e 20-të