Juventus kërkon të marrë falas Maignan, por e kërkojnë dhe Chelsea e Bayerni

E ardhmja e Mike Maignan duket gjithnjë e më larg Milanit, pas dështimit të bisedimeve për rinovimin e kontratës. Kjo situatë e vendos portierin francez drejt skadencës në qershorin e ardhshëm dhe e bën menjëherë objektiv të klubeve të mëdha që kërkojnë një numër një të nivelit të lartë.

Chelsea është tashmë në garë, ndërsa Bayern Munich po përgatitet të hyjë seriozisht në negociata. Juventus gjithashtu po ndjek me vëmendje zhvillimet, duke parë mundësinë për të përfituar në rast se Maignan vendos të mos rinovojë me kuqezinjtë.

Pak ditë më parë, portieri 29-vjeçar ishte protagonist me një pritje spektakolare ndaj Gatti-t në “Allianz Stadium”, duke i dhënë Milanit një pikë të vlefshme kundër Juventusit.

Por që Maignan të ishte “magjik”, siç e quajnë tifozët, dihej prej kohësh, edhe pas një sezoni jo shumë të ndritshëm. Këtë vit, ai ka rikthyer shkëlqimin që e bëri pasardhësin ideal të Gianluigi Donnarummas në portën e Milanit, pa bërë askënd të ndjejë mungesën e tij.

Me një pagë aktuale prej 2.8 milionë eurosh në sezon, kontrata e Maignan nuk është e paarritshme, çka i lejon çdo klub të ofrojë një rritje të ndjeshme pa kaluar në shifra të ekzagjeruara. Muajt e ardhshëm pritet të jenë vendimtarë, me shumë kontakte mes përfaqësuesve të lojtarit dhe klubeve të interesuara.