Juventus mund me lehtësi Genoan, nuk gabon as Napoli (VIDEO)

Juventus fiton dhe bind edhe ndaj Genoas. Pas triumfit ndaj Napolit në mesjavë, skuadra bardhezi mundi 3-1 pa shumë probleme skuadrën e Ballardinit. Bardhezinjtë zhbllokuan sfidën që në minutën e 4-t me Kulusevskin, i cili e dërgoi topin në trekëndësh pas një pasimi të Cuadrados nga krahu i djathtë. “Zonja e Vjetër” luan shumë shpejt, teksa me një kundërsulm në minutën e 22-të gjen golin e dytë, teksa fillimisht Chiesa dhe Ronaldo nuk kishin fat. Morata ishte në vendin e duhur për të shënuar me të majtën.

Fillimi i pjesës së dytë ndërkohë ishte më i mirë për Genoan që rihapi sfidën me Scamacca-n, i cili i shpëtoi mbulimit të De Ligt për të realizuar më pas me kokë. Pirlo vendos të ndërhyjë në formacion duke hedhur në fushë Dybala-n dhe McKennie. Ky i fundit ndërkohë arrin që të shënojë golin e tretë dhe të qetësisë pas një pasimi të Danilos.

Nuk gabon as Napoli, që triumfoi pastër 2-0 në transfertën ndaj Sampdorias. Fabian Ruiz dhe Osimhen ishin autorët e golave. Lazio triumfoi minimalisht 1-0 ndaj Veronës, me një gol në minutën e dytë shtesë të Milinkovic-Savic. /R.Lika-Koha Jone/