Juventus rigjen fitoren ndaj Sassuolos, zhbllokohet David

Juventus kundërpërgjigjet Romës dhe fiton bindshëm në Reggio Emilia. Në javën e 19-të të Serie A, bardhezinjtë triumfojnë 3-0 ndaj Sassuolos në “Mapei Stadium”, duke mbyllur giron e parë në zonën Champions.

Ndeshja u zhbllokua në minutën e 16-të, kur një krosim i Kalulu u devijua fatkeqësisht në portën e vet nga Muharemovic, i cili me kokë mposhti portierin e tij. Juventus kontrolloi ritmin e lojës dhe e thelloi epërsinë në pjesën e dytë, ku u shfaq protagonisti më i diskutuar i momentit në shtëpinë bardhezi.

Në harkun e dy minutave, Jonathan David, i hedhur titullar nga Spalletti pavarësisht penalltisë së humbur ndaj Leçes, ishte vendimtar: në minutën e 62-të shërbeu asist për Miretti për golin e 2-0, ndërsa menjëherë më pas përfitoi nga gabimi në pasim i Idzes për të shënuar personalisht golin e tretë dhe për të mbyllur ndeshjen.

Me këtë fitore, Juventusi arrin kuotën e 36 pikëve në fund të fazës së parë të kampionatit, duke u renditur në vendin e katërt së bashku me Romën, por me një gol më shumë në diferencë golash. Ndërkohë, Sassuolo i drejtuar nga Grosso mbetet në 23 pikë, duke mos arritur të reagojë përballë një Juventusi cinik dhe të organizuar.