Harry Kane është futur mes pretendentëve kryesorë për të fituar Topin e Artë. Sulmuesi i Bayern Munich ka marrë Këpucën e Artë europiane si golashënuesi më i mirë i kampionateve të kontinentit, ndërsa sezoni 2025/26 i ka dhënë një kandidaturë të fortë për çmimin individual më prestigjioz në futboll.
Gjatë ceremonisë së ndarjes së çmimit në Mynih, kapiteni i Anglisë bëri bilancin e një sezoni të jashtëzakonshëm.
“Ka qenë sezoni im më i mirë, 2025/26, në çdo aspekt, si fizikisht ashtu edhe mendërisht, në një skuadër të madhe si Bayern”, u shpreh Kane.
Në mbështetje të kandidaturës së tij kanë dalë edhe disa prej legjendave të futbollit anglez dhe botëror. Gary Lineker, Alan Shearer, Rio Ferdinand dhe Robert Lewandowski e kanë konsideruar Kane si një pretendent serioz për Topin e Artë.
Sulmuesi anglez ka një CV të fortë për të synuar trofeun. Me Bayern Munich ai fitoi Bundesligën dhe Kupën e Gjermanisë, ndërsa u shpall edhe golashënuesi më i mirë i kampionatit dhe fitoi Këpucën e Artë europiane.
Edhe me kombëtaren angleze, Kane pati një paraqitje të rëndësishme. Anglia e mbylli Botërorin në vendin e tretë, ndërsa sulmuesi realizoi gjashtë gola, duke konfirmuar edhe një herë aftësitë e tij para portës.
Megjithatë, Kane preferon të mos flasë me shumë entuziazëm për mundësinë e fitimit të Topit të Artë.
“Nuk varet nga unë nëse do ta fitoj Topin e Artë. E di që do të flitet shumë për këtë deri në tetor, por nuk është diçka për të cilën mendoj. Mund të them vetëm se sezoni 2025/26 ishte padyshim më i miri i jetës sime”, deklaroi ai.
Kane shtoi se tashmë është i fokusuar te sezoni i ri dhe objektivat e Bayern Munich.
“Topi i Artë është një çmim i jashtëzakonshëm, por unë jam tashmë i përqendruar te ajo që na pret këtë sezon dhe te finalja e Superkupës të shtunën”, përfundoi sulmuesi.