Kane flet për të ardhmen te Bayerni: Jam i lumtur, nuk e pres rinovimin për një javë!

Bayern Munich vazhdon të tregojë forcën e tij në Gjermani dhe Europë, ndërsa Harry Kane mbetet një nga protagonistët kryesorë të skuadrës së Vincent Kompany. Pas fitores së thellë 5-0 ndaj Bodo/Glimt, sulmuesi anglez foli edhe për të ardhmen e tij në klub.

Bayern Munich e nisi sezonin me ritëm të lartë dhe fitorja 5-0 ndaj skuadrës norvegjeze Bodo/Glimt ishte një tjetër dëshmi e forcës së kampionëve të Gjermanisë. Në listën e golashënuesve ishte edhe Harry Kane, i cili vazhdon të jetë një nga lojtarët më të rëndësishëm të skuadrës së Vincent Kompany.

Megjithatë, përtej paraqitjeve në fushë, e ardhmja e sulmuesit anglez vazhdon të jetë në qendër të vëmendjes. Kontrata e Kane me Bayern Munich ka bërë që disa prej klubeve më të mëdha europiane të monitorojnë situatën, veçanërisht nëse nuk arrihet një marrëveshje e re. Pas ndeshjes, Kane foli për Sky Sport dhe dha sinjale pozitive sa i përket rinovimit të kontratës.

“Nuk pres që marrëveshja të arrihet javën e ardhshme apo atë pasardhëse, por shpresojmë që të arrijmë një marrëveshje brenda një ose dy muajve”, deklaroi sulmuesi.

Kane theksoi se negociatat po ecin mirë dhe se ai është i qetë për të ardhmen.

“Bisedimet do të vazhdojnë të ecin mirë. Jam shumë i qetë dhe mund të jeni edhe ju të qetë, sepse mes nesh gjithçka po shkon mirë. Jam shumë i lumtur këtu te Bayern Munich”, u shpreh sulmuesi anglez.

Kane foli edhe për objektivat e Bayern Munich në Europë, duke paralajmëruar rivalët se skuadra gjermane është edhe më e fortë pas një viti pune me Kompany.

“Jemi një kërcënim për çdo skuadër. Kemi edhe një vit më shumë punë me trajnerin dhe i kuptojmë gjithnjë e më mirë idetë e tij”, tha Kane.