Kaos te Kosova, Hadërgjonaj vendos të mos luajë më nën drejtimin e Fodës te “dardanët”

Kombëtarja e Kosovës përballet me një situatë të re në prag të ndeshjeve të Nations League. Mbrojtësi Florent Hadërgjonaj ka bërë të ditur se, për momentin, nuk do të jetë në dispozicion të Dardanëve për sa kohë ekipi drejtohet nga stafi aktual teknik, nën urdhrat e trajnerit Franco Foda.

Hadërgjonaj e ka bërë publik vendimin përmes një deklarate të publikuar në Instagram, duke sqaruar se nuk bëhet fjalë për tërheqje nga Kombëtarja e Kosovës, por për një vendim që lidhet me situatën aktuale dhe raportet e tij me stafin teknik.

“Pas shumë mendimi, kam marrë vendimin që, për momentin, të mos jem më në dispozicion të Kombëtares së Kosovës nën drejtimin e stafit aktual teknik”, shkruan Hadërgjonaj.

Mbrojtësi thekson se përfaqësimi i Kosovës ka një rëndësi të veçantë për të dhe se është krenar për çdo paraqitje me fanellën dardane.

“Ta përfaqësoj Kosovën ka qenë dhe mbetet një nga nderet më të mëdha të karrierës sime. Jam krenar për çdo paraqitje dhe për gjithçka që kam dhënë për këtë fanellë”, vijon ai.

Hadërgjonaj thotë se gjatë më shumë se dy viteve të fundit ka zgjedhur të mos flasë publikisht për situatën, duke preferuar që përgjigjen ta japë në fushën e lojës. Megjithatë, sipas tij, me kalimin e kohës është krijuar bindja se marrëdhënia profesionale me trajnerin aktual nuk mund të vazhdojë në të njëjtat kushte.

“Me kalimin e kohës është bërë e qartë për mua se me trajnerin aktual nuk ekziston më baza e nevojshme e respektit dhe ndërsjellë e besimit për të vazhduar një bashkëpunim profesional. Për këtë arsye, kam arritur në një pikë ku duhet të vendos një kufi”, shprehet futbollisti.

Në fund të deklaratës së tij, Hadërgjonaj ka theksuar se vendimi nuk është marrë kundër Kosovës dhe se dera e tij për Kombëtaren nuk është mbyllur.

“Kjo nuk është tërheqje nga Kombëtarja dhe nuk është vendim kundër Kosovës. Vendimi im lidhet vetëm me situatën aktuale dhe raportin tim me stafin teknik”, përfundon Hadërgjonaj.