Kërkesa e madhe për fanellat e Gjermanisë krijon problem te Adidas, mbaron shkronja “V”

Entuziazmi i tifozëve të Gjermania gjatë Botërorit 2026 ka sjellë një situatë të pazakontë për Adidas. Kompania gjermane ka konfirmuar se ka mbetur përkohësisht pa shkronjën “V”, e nevojshme për personalizimin e fanellave zyrtare të kombëtares.

Sipas raportimeve të medias gjermane Bild, kërkesa e lartë për fanellat me emrat e Kai Havertz, Deniz Undav dhe Aleksandar Pavlovic ka bërë që rezervat e shkronjës “V” të shterojnë, duke pamundësuar për momentin porositjen online të fanellave me këta mbiemra.

“Numri i madh i kërkesave për personalizimet e fanellave të Undav, Havertz dhe Pavlovic ka shkaktuar një mungesë të përkohshme të shkronjës ‘V’”, deklaroi një zëdhënës i Adidas.

Megjithatë, kompania ka bërë të ditur se problemi do të zgjidhet shpejt, pasi furnizimet e reja janë tashmë në proces dhe fanellat do të rikthehen së shpejti në shitje.

Shitja e fanellave gjatë turneve të mëdha përbën një nga burimet kryesore të të ardhurave për kompanitë sportive. Për Botërorin 2026 në SHBA, Kanada dhe Meksikë, Adidas furnizon me pajisje sportive 14 nga 48 kombëtaret pjesëmarrëse dhe parashikon të ardhura prej rreth 1 miliard eurosh të lidhura drejtpërdrejt me turneun.

Sipas kompanisë, fanella e dytë blu e Gjermanisë po regjistron shitje mbi pritshmëritë. Kërkesa është rritur ndjeshëm pas shpalljes së listës përfundimtare të lojtarëve dhe me nisjen e Botërorit.

Aktualisht, tifozët në Gjermani mund të zgjedhin mes dy versioneve të fanellës zyrtare: modeli standard me çmim 100 euro dhe versioni premium që kushton 150 euro.

Edhe Puma, e cila furnizon 11 kombëtare pjesëmarrëse në Botëror, është shprehur e kënaqur me ecurinë e shitjeve. Sipas kompanisë, fanellat e Portugalia po rezultojnë ndër më të kërkuarat, ndërsa interes të madh kanë tërhequr edhe ato të Zelanda e Re, Maroku, Senegali dhe Bregu i Fildishtë.

Botërori 2026 do të jetë gjithashtu i fundit për Gjermaninë me logon e Adidas në fanellë. Duke nisur nga viti 2027, Federata Gjermane e Futbollit do të kalojë zyrtarisht te Nike, duke i dhënë fund një partneriteti historik që ka zgjatur për më shumë se shtatë dekada. Ky ndryshim shënon fundin e një prej bashkëpunimeve më ikonike në historinë e futbollit botëror.