Kevin Dodaj prezantohet te CSKA e Sofjes: Një nga talentet më të mëdhenj!

Një nga talentet më premtues të futbollit shqiptar, sulmuesi 19-vjeçar Kevin Dodaj, ka hedhur hapin e radhës në karrierën e tij, duke firmosur me klubin legjendar bullgar, CSKA Sofja. Pas kalimit me sukses të testeve mjekësore, klubi 31 herë kampion i Bullgarisë konfirmoi zyrtarisht afrimin e tij, duke e prezantuar me fanellën numër 22.

Dodaj, i cili vjen nga Vllaznia e Shkodrës, njihet për fleksibilitetin në repartin ofensiv, pasi mund të luajë si në krahë ashtu edhe në qendër të sulmit. Në deklaratën për shtyp, CSKA e cilësoi Dodajn si një lojtar me potencial të madh dhe theksoi se ai do të jetë një aset i rëndësishëm për skuadrën.

Ky transferim shënon gjithashtu rastin e dytë që një futbollist shqiptar vesh fanellën e CSKA Sofjes, pas ish-mbrojtësit të njohur të Kombëtares shqiptare, Altin Haxhi.

Para largimit, Dodaj la një gjurmë të fortë te Vllaznia, duke qenë protagonisti kryesor në përmbysjen dramatike ndaj Daugavpils, që i dha kuqebluve kualifikimin për në turin e dytë të Conference League. Klubi shkodran ka përfituar rreth 450 mijë euro nga ky transferim dhe ka ruajtur gjithashtu 15% të kartonit të lojtarit për një shitje të mundshme në të ardhmen.

Pas zyrtarizimit nga CSKA, edhe Vllaznia reagoi duke i uruar suksese Dodajt në aventurën e re, duke theksuar se e gjithë skuadra dhe tifozët janë krenarë për rritjen e tij si lojtar.

Dodaj është gjithashtu pjesë e ekipit kombëtar U-21, ku ka zhvilluar 7 ndeshje dhe ka shënuar 1 gol, duke u konfirmuar si një element kyç për të ardhmen e futbollit shqiptar.