Eliminimi i Gjermanisë në fazën e 1/16-ave të finales së Kupës së Botës nga Paraguai vazhdon të shkaktojë reagime dhe debate të forta në vend, ndërsa futbollistët e kombëtares kanë nisur analizën e një tjetër dështimi të madh në arenën ndërkombëtare.
Kapiteni i Gjermanisë, Joshua Kimmich, nuk kërkoi justifikime pas humbjes dhe pranoi se skuadra nuk arriti të tregojë nivelin e kërkuar gjatë gjithë turneut.
Duke folur pas ndeshjes, mesfushori gjerman u shpreh i zhgënjyer nga paraqitjet e ekipit dhe vlerësoi se eliminimi ishte pasojë e drejtpërdrejtë e performancave të dobëta në fushë.
“Është një ndjenjë e tmerrshme. Nuk luajtëm mirë kundër asnjërit prej kundërshtarëve tanë. Patëm shumë vështirësi në të tre ndeshjet ndaj skuadrave që nuk konsiderohen të nivelit më të lartë botëror. Ky është një fakt. Ne e merituam eliminimin,” deklaroi Kimmich.
Fjalët e kapitenit pasqyrojnë zhgënjimin që ka përfshirë kampin gjerman pas daljes së hershme nga Botërori, një rezultat që vjen pas disa paraqitjeve nën pritshmëri në turnetë e fundit madhorë.
Eliminimi ndaj Paraguait ka shtuar presionin mbi stafin teknik dhe drejtuesit e federatës, ndërsa në Gjermani po diskutohet gjerësisht për të ardhmen e kombëtares dhe hapat që duhen ndërmarrë për rikthimin e saj në elitën e futbollit botëror.