Gjermania e Jürgen Klopp po përgatitet të nisë zyrtarisht një kapitull të ri. Të enjten, më 17 shtator, pritet të publikohet lista e parë e lojtarëve të grumbulluar nga trajneri i ri i kombëtares, i cili duket se ka zgjedhur një qasje ndryshe nga ajo tradicionale.
Sipas raportimeve të Kicker, Klopp po shqyrton mundësinë për të grumbulluar deri në 30 futbollistë, ndërsa nga brenda kampit gjerman flitet edhe për një grup shumë më të madh, që mund të arrijë në rreth 40 lojtarë.
Ideja është që futbollistët të mund të bashkohen me ekipin dhe të largohen nga grumbullimi në varësi të nevojave të stafit teknik. Në këtë mënyrë, Klopp synon të vëzhgojë sa më shumë alternativa dhe njëkohësisht të menaxhojë ngarkesën fizike të lojtarëve.
Kalendari i Gjermanisë është tejet i ngjeshur. Debutimi i Klopp në stol do të vijë më 24 shtator në Amsterdam, në përballjen ndaj Holandës. Më pas, Gjermania do të përballet me Greqinë më 27 shtator në Augsburg, me Serbinë më 1 tetor në Mynih dhe sërish me Greqinë më 4 tetor në Selanik.
Pavarësisht grupit të zgjeruar, rregullat e UEFA-s lejojnë që për çdo ndeshje të regjistrohen maksimumi 23 lojtarë, përfshirë tre portierë. Kjo do të thotë se Klopp do të duhet të bëjë zgjedhje të ndryshme për secilën sfidë.
Që prej prezantimit të tij në korrik, Klopp kishte bërë të qartë se dëshironte t’u jepte mundësi lojtarëve që e meritojnë një vend në kombëtare. Në atë periudhë, trajneri kishte bërë me dije se stafi i tij po monitoronte 57 futbollistë të fushës.
Në listën e emrave që mund të marrin ftesën e parë përfshihen Paris Brunner, Yann Bisseck, Tom Bischof dhe Finn Jeltsch.
Një emër që tërheq vëmendje është edhe Nicolò Tresoldi, sulmuesi që ka qenë gjithashtu në radarët e Kombëtares së Italisë.
Ndërkohë, Klopp mund t’u japë një tjetër mundësi edhe disa lojtarëve që kanë mbetur jashtë planeve të fundit të Gjermanisë. Mes tyre përmenden Karim Adeyemi, Jonathan Burkardt dhe Niclas Füllkrug, ish-sulmuesi i Milanit.
Një nga dilemat më të mëdha për Klopp lidhet me portën. Pas tërheqjes përfundimtare të Manuel Neuer, Gjermania nuk ka më një titullar të padiskutueshëm mes shtyllave.
Në garë për fanellën e parë janë Marc-André ter Stegen, Oliver Baumann, Jonas Urbig, Alexander Nübel dhe Noah Atubolu.
Mes kandidatëve është edhe një emër surprizë: Loris Karius, ish-portieri i Liverpoolit dhe një futbollist që Klopp e njeh shumë mirë nga koha e përbashkët në Angli. Karius, i cili aktualisht luan te Schalke 04, mund të jetë një nga surprizat e listës së parë të trajnerit gjerman.
Me një grup të zgjeruar, emra të rinj dhe rikthime të mundshme, Klopp duket se po përgatitet ta nisë aventurën me Gjermaninë duke i dhënë vetes sa më shumë alternativa në dispozicion.